Um Bakarameistarann

Bakarameistarinn hefur verið í fararbroddi í sinni grein allt frá því hjónin Sigþór Sigurjónsson bakarameistari og Sigrún Stefánsdóttir stofnuðu fyrirtækið í janúar árið 1977. Opnun Bakarameistarans í Suðurveri olli svo að segja straumhvörfum á sínu sviði, enda höfðu Reykvíkingar ekki áður kynnst viðlíka þjónustu og vöruúrvali eins og Bakarameistarinn varð strax kunnur fyrir. Markmið fyrirtækisins voru snemma mjög skýr; að vera í fararbroddi með nýjungar og öfluga vöruþróun, bjóða upp á mikið vöruúrval, hraða og örugga þjónustu, góða fagmenn í bakstrinum og síðast en ekki síst að nota einungis gæðahráefni til að búa til úrvalsvöru. Þessum atriðum hefur ávallt verið haldið til haga í rekstrinum.  

Bakarameistarinn starfrækir nú níu kaffihús víðsvegar á höfuðborgarsvæðinu. Þótt starfsfólki okkar hafi fjölgað úr 20 árið 1977 í rösklega 170 manns hafa markmið Bakarameistarans ekkert breyst og eru alltaf jafn skýr; við þjónum þér!

Úrval Bakarameistarans

Í Bakarameistaranum er boðið upp á fjölbreytt úrval af brauði, bakkelsi og smurðu brauði. Í hádeginu er alltaf séð til þess að smurbarinn sé sneisafullur af hollum og góðum skyndibita sem viðskiptavinir geta gætt sér á í notalegu umhverfi í dagsins önn. Veisluþjónusta fyrirtækisins býður svo upp á einkar hentugar lausnir fyrir stóra sem smáa hópa og fyrirtæki við öll tækifæri.
 

Kaffi Bakarameistarans er malað úr úrvals Chaqwa kaffibaunum og eru cappucino og café latte vinsælustu tegundirnar. Meðlætið á kaffihúsunum streymir úr ofninum allan liðlangan daginn; heitar ostaslaufur, skinkuhorn, vínarbrauð og croissant. Þá er tertuborðið ekki síður girnilegt og fjölbreytt og minnir á hversu gott er að geta gripið með sér tertu í vinnuna, í afmælið eða á fundinn, án þess að þurfa að panta kræsingarnar með fyrirvara.

Upplýsingaskylda skv. 6.gr. laga nr. 30/2002 um rafræn viðskipti:
Bakarameistarinn ehf. 
Stigahlíð 45-47
105 Reykjavík
Kt. 680177-0159
Netfang: pantanir@bakarameistarinn.is
Vsk. nr. 10373
Skráð í fyrirtækjaskrá: https://www.rsk.is/fyrirtaekjaskra/leit/kennitala/6801770159
Leyfi og eftirlitsaðilar: Heilbrigðiseftirlit Reykjavíkur, Heilbrigðisnefnd Hafnarfjarðar og Kópavogssvæðis. 
Starfsleyfi frá Reykjavík, Kópavogi og Hafnarfirði. 
Aðilar að Landsambandi Bakarameistara og Samtökum Iðnaðarins og SA. 
Lögverndað starfsheiti Bakarameistari frá stofnun 1977 og leyfi til að hafa nema.